م





[ رسائل جديدة · المشاركين · قواعد المنتدى · بحث · RSS ]
صفحة 1 من%1
منتدى » المواضيع العامه » للمبتدئين » للمبتدئين فى النـــــــــــــــتش (كل مايخص تدريب الحمام على النش من الألف الى الياء)
للمبتدئين فى النـــــــــــــــتش
amrالتاريخ: الخميس, 2013-03-16, 10:02 PM | رسالة # 1
مدير الموقع
مجموعة: المدراء
رسائل: 22
سمعة: 0
حالة: Offline
" النـــــــــــــــــش "
. ~~~~~~~~~~~~~~~~ .

السلام عليم ورحمة الله وبركاته
...............................................
أولاً :-
............
بالنسبه لحمام النش ف العيون أو الأبواب مابتبقاش زي عيون السلاكه االلى بنفرخ فيها .. بتبقى عباره عن مساطب فوق وأبواب ذكور تحتها

- بالنسبه للمسطبه فى دي بتبقى بعرض العيون كلها ومساحتها على حسب مساحة الغيه
- بالنسبه لأبواب الذكور بتبقى مستطيله بمساحة :-
عرض : من 40 س م إلى 50 س م
إرتفاع : من 30 س م إلى 35 س م
العمق : من 50 س م إلى 60 س م
وطبعاً الكلام دا كله على حسب مساحة الغيه بتاعتك

ملحوظه : احنا فى السلاكه اللى بنفرخ فيها بنحط داخل كل عين مكلف وسقه وطاجن للبيض
بالنسبه بقى لابواب الذكو ف بنحط فيها مكلف ومسقه و ( قانقر )
والقانقر دا عشان الفرد يقف عليه وريشه مايتبهدلش

...........................................................................................

ثانياً:-
............
تشتري مجموعة زغاليل وتحاول بقدر الامكان أن يكون عمرهم مقارب
لبعض .. ممكن تبدء ب10 زغاليل أو أكثر على حسب إمكانياتك الماديه

- بالنسبه لإختيار الأنواع : أى حد هتسأله هيقولك على حسب إمكانياتك الماديه !! لكن أنا أنصحك حتى لو إمكانياتك الماديه تسمحلك بنش حمام غالى الثمن ف الأفضل إنك ك مبتدئ فى النش
إنك تبدء بالحمام المتوسط .. يعنى ولا يكون حمام بظرميط أو تقليبه تعبان ويسد نفسك ولا يكون حمام عالى وغالى الثمن لو خسرته يحرق قلبك .

- سؤال : ايه هي أفضل الأنواع فى النش و ايه هي الانواع اللى ممكن أبدء بيها ؟؟..........
الإجابه : حمام النش هو ( الغزار - الرمايه والكرزلي - الكوجك- الشوامه أو الشامي )
- الغزار والكوجك : حمام بيحب يطير فى العالى وينجم لكن حوالين الغيه .
- الرمايه والكرزلى : حمام بيحب الجري والمسافات
- الشوامه أو الشامي : اسلوبه فى الطيران بيعتمد على الفرد نفسه بس فى اأغلب الاحيان بيكون محايد وفى اغلب الاوقات بنستخدمه فى التزاويد او الثانيه والثالثه لكن دا طبعاً مايمنعش أن ممكن زغلول عبسي يطلع جامد ويبقى ذكر فى الاولى ..
اما بالنسبه للانواع اللى أنصحك تبدء بيها هي الأستراليات والكرزليات او الجمعيات ومافيش مانع لو جبت فيهم كراكندي او عبسي .
................................................................................................

ثالثاً :-
................
1- بتحط الزغاليل كلها مع بعض فى مسطبه عشان يحفظوا بعض

- ملحوظه : ( حمام النش أسلوب كلفته او أكله غير حمام الفرخ
الكلفه مابتبقاش فيها خشونه كتير يعنى مابيبقاش فيها فول وبسله والكلام دا لا الكلفه يستحسن تكون عويجه فقط )

2- أول يوم سيب الزغاليل محبوسه فى المسطبه وأخر النهار فى ميعاد انت تحدده عشان كل يوم تكلف في نفس الميعاد بس يكون قبل المغرب مثلا بساعه وتكلف فى المسطبه أول يوم بس.. لو مثلا 10 زغاليل ممكن تحطلهم 8او9 كبشات زرة يعنى اعمل حساب كبشه لكل زغلول ونصف ساعه وتشيل الاكل وتقلب المكلف وبعد المغرب بالليل تفتح ابواب المسطبه وتسيبها مفتوحه .

- معلومه : ناس كتير بتحبس الزغاليل بعد المغرب وتسيبها الصبح
لكن الأفضل انك ماتقفلش عليهم ممكن بعد المغرب تشد القمرايه وتمسكهم وتحطهم فى المسطبه وهما هيتعودوا لوحدهم بعد المغرب يحبسوا فى المسطبه .

- اليوم الثاني : هتطلع تبص عليهم لو ماطلعوش من المسطبه سيبهم لحد ميعاد الكلفه ونزلهم على الارض وتكلف فى الارض
وعلى فكره ممكن وانت بتحط الكلفه تصفر بصوت خفيف كدا عشان تعودهم على صفاره معينه لو حبيت تنزلهم من على الظهر فى اى وقت تصفرهلهم ينزلوا smile .

- ملحوظه : فى ناس كتير بتمسك الزغاليل وتحطها على الظهر ودا غلط ..
سيبهم براحتهم يطلعوا لوحدهم وحاول انك ماتخوفهمش لو رفعوا على الظهر عشان مايخافوش من المكان من أولها .

- وان شاء الله لما يبدئوا يطلعوا وينزلوا على الظهر ماتحاولش تكش فيهم ولو شوفت زغلول شد حيله وطلع رفرفله شويه حوالين العشه دا مش معناه انه كدا كبر ويقدر يلف وتكش فيه لا لو عملت كدا أضمن أن كلهم هيضيعوا

- سؤال مهم : أنا جمبي عماره عاليه الزغاليل بتطلع تركن عليها اعمل ايه ؟؟...........
الإجابه : لو العماره قريبه أوى من الغيه فى البدايه سيبهم يتدشروا ويعرفوا المكان ولما يشدوا حلهم ممكن واحده واحده تبدء تخوفهم من المكان ولما يركنوا تسقفلهم سقفه وتكش فيهم ممكن تحدفلهم خشبايه صغيره بس طبعاً ماتكونش تقيله وحاول انها ماتخبطش فى شباك تكسره لجيرانك او تنزل الشاره تإذي حد بيها ..
اما لو بيركنوا على عماره بعيده فى ناس بتروح تستأذن السكان او صاحب البيت وتحط فوق العماره اللى الحمام بيركن عليها خيال مئاته
يعنى خشبتين وقميص قديم عندك وتسبتهم فوق العماره هيعملوا الصح .

سؤال : أنا عندي الزغاليل بتفضل طول اليوم راكنه ومابتنزلش على الغيه الا على ميعاد الأكل ؟؟.........
الإجابه : طبعاً ماهو لازم يفضلوا راكنين طول اليوم لان حضرتك كل شويه تدخل تمسك فيهم وتكش فيهم زي الاهبل لحد ماجننتهم وخوفتهم من المكان وعشان كدا كنت لسه قايلك من شويه تسيبهم براحتهم يطلعوا أو ينزلوا مالكش انت دعوه دلوقتى ..

- وهنفضل على كدا نتعامل بهدوء معاههم لحد مايفكوا أول ريشه

............................................................................................

رابعاً :-
............
اول مالزغاليل تبدء تفوك ريش نبتدي نكش فيهم كشه واحده فى اليوم بس تنقي الوقت اللى مافيش ناس كتير مسيبه فيه يعنى ماتجيش على وقت المغرب وتكش فيهم لا خليك الصبح بدري أو مابين الظهر والعصر .. لو جمبك عماره قريبه منك اوى يبقى اول ماتكش فيهم ويطيروا تنزل تحت تبص عليهم لو لاقيت حاجه هتركن قبل مايحط على العماره اديله سقفه على إيدك ولو صمم وماخفش احدفله خشبايه صغيه قبل مالباقي يركن معاه
لو لفوا ورجعوا يركنوا تانى سيبهم شويه على العماره وابقى ارجع كش فيهم تانى بعد شويه ولما ينزلوا على الغيه حاول بقدر الامكان بردو انك ماتخوفهمش .

سؤال : أنا الحمدلله الغيه بتاعتي فى موقع كويس ومافيش جمبي عماره عاليه يركنوا عليها ف عادي لو كشيت فيهم أكثر من مره ؟؟
الإجابه : لا طبعاً بردوا ماتكشش فيهم كتير لان لو مافيش مركن جمبك أكيد فى اكثر من غيه ممكن يروحوا يحطوا عليها والطارات تاخدهم بالأحضان يا معلم وماتشوفهمش تانى .

- وتبدء تشد عليهم واحده واحده مره مع الوقت وبدال مكانت كشه واحده تبقى مرتين وواحده واحده تبدء تديهم صفاره عاليه واحده واحده تبتدي ترفعلهم العلم عشان تشد عليهم شويه .
............................................................................................

خامساً :-
.............

بعد مالزغاليل الحمدلله كبرت وبقوا شباب وقربوا يخلصوا فك الريش
وبقى عليهم ريشتين ( الصمه والعديله ) ..
نبتدي نشوف إذا كانوا كلهم ذكور او فيهم نتي

- لو لاقيت مثلا نتايتين تقوم واخدهم ياتبيعهم يا تسيبهم فى السلاكه بعيد عن الذكور وتفرخهم ..

- وتاخد الذكور وتحط كل ذكر لوحده فى باب وبعد ماكنت بتسيب الحمام فى وقت بدري دلوقتى هتسيب الحمام قبل المغرب على الساعه 4ونصف او 5 م واول مالمغرب يأذن تقوم داخل حاتط لكل ذكر قبشه واحده بس من العويجه فى المكلف اللى في الباب بتاعه وبعد نصف ساعه تطلع تبص لو لاقيت فرد مش محبس وواقف على الارض اسحب القمرايه وادخل حطه فى الباب بتاعه وتلم الكلفه وتقلب المكاف .. ويوم بعد يوم كل ذكر هيحفظ الباب بتاعه .
.......................................................................................
سادساً
.............

إختيار حمام الأولى :-
طبعاً انت كل يوم بتشوف حمامك وهو طاير يعنى تقدر تميز بكل سهوله مابين الحمام القوي اللى نفسه طويل والاقل والاقل
يعنى تختار أقوى ذكور من حيث النفس طبعاً مش التقليب ويبقوا دول الأولى يعنى اول ابواب بتتفتح وبعدها بشويه تسيب الباقي معاهم .

سؤال : انا بسيب عندي 20 فرد منهم 5 بينزلوا بسرعه و5 يعنى بيطولوا شويه وال10 الباقين بسم الله ماشاء الله بيرجعوا بعد وقت طويل ف ايه اللى يتعمل بالنسبه لل5 اللى قدرتهم متوسه يعنى هيبقوا اولى ولا ثانيه ؟؟

الاجابه : بالنسبه ل10 الجامدين دول اولى وبالنسبه لل5 المتوسطين دول الثانيه وبالنسبه ل5 اللى نفسهم قصير ف دول ثالثه أو تزاويد

عدة الشغل بقى :-
...........................
- ( علــــــــم احمر - وصفاره عاليه - وسيخ حديد )

العلم والصفاره بنستخدمهم أثناء النش عشان الحمام يبعد بمعنى انه يجري وينجم فى السماء ( يعلى )
اما بالنسبه للسيخ ف بنستخدمه مثلا لو فرد غريب دخل وسط حمامك وفجاه طلع منهم !! تقوم ساحب السيخ الحديد بسرعه وخابط بيه على ظهر العشه والحركه دي اسمها ( رمـــي سيخ ) اول ماترمي السيخ هتلاقي الحمام كله اتفشكل وخد الفرد الغريب تانى فى الزحمه ويلموا تانى مع بعض واول ماتحس ان الحمام خلاص هيحط كله على الغيه نزل العلم وروح اقف فى النظاره بس اهم حاجه تاخد بالك كويس وانت بتلف اى حاجه غريبه تنزل عندك من موقع حمامك انت لان لو فرد من حمامك واقف عند الخرزان بتاع المضرب اللى واقف عنده الفرد الغريب وشديت انت المقبض هيبقى عليه العوض فى الفرد بتاعك انت .

............................................................................................
قانـــــــــون النــــش :-
................................
1- كل غاوي عامل غيه عاليه لافف الظهر بطارات
( مضارب الصيد)
ودا معناه انه فى كامل الاستعداد لاستقبال حمامك وحمام غيرك
ف مش من حقه يسالك فى حمامه لو انت مسكته لان الموضوع عامل زي واحد دخل منطقه شعبيه وماسك فى ايده سلاح يبقى لما واحد من سكان المنطقه دي يعوره يبقى حقه .
2- فى حاجه اسمها صلح بمعنى انك بتبقى متفق مع الغواة اللى حواليك انك لو ماتمسكش منهم حاجه ولا هما يمسكوا منك حاجه واللى يمسك للثانى حمام يرجعهوله بدون اى مقابل
3- فى غواه مش بتحب موضوع الصلح ابدا ويقولك اللى تمسكه منى حلال عليك واللى امسكه منك ماتسألنيش فيه إلا لو هتشتريه وطبعا هتشتريه بالسعر اللى هو يحدده ويكون مناسب على تقليب الفرد ونوعه .
4- من الأخلاق اللى بتمنى ان الناس كلها تتعامل بيها أن لما يجيلك عيل صغير او واحد بيربي فى بلكونه ويطلب منك الحمام بتاعه تديهوله بدون اى تردد وبدون نقاش بمجرد مايوصفلك كشل الفرد
.. لان لو الموضوع زى ماشبهته من شويه بموضوع السلاح ف أنت دلوقتى زي واحد مسلح وبيحارب واحد أعزل بدون اى سلاح .. هو مابيمسكش ولا منك ولا من غيرك يعنى هنا موضوع الصلح فارض نفسه إجباري .
...........................................................................................
سابعاً :-
.................
النش الليلي ويسمى ب( التكــــحـــيــل )

1- لازم على قد ماتقدر توفر إضاءه عاليه حوالين الغيه وجواها عشان الحمام وهو طاير يشوف المكان كويس
2- بدال ماكنت بتكلف وقت المغرب دلوقتى هتأخر الكلفه لقبل العشاء
3- تبتدي تدريجياً تاخر نزول الحمام يعنى تفضل شغال بالعلم ماتسيبش الحمام يحط بس وللمره الثنيه بقول تدريجياً يعنى ماتجيش مره واحده وتفضل شغال بالعلم الله ينور لحد بعد العشاء ماتأذن لو عملت كدا تبقى بتجازف اكبر مجازفه بحمامك انما واحده واحده وعلى فترات وماتنساش تسيب النور قايد بعد ماتكلف عشان لحمام يعرف ياكل

بتمنى نكون قدمنا موضوع مهم للناس اللى لسه ماعندهمش خبره فى النش ونكون قدمنالهم إفاده جيده وربنا بغذن الله يكرم الجميع

كاتب الموضوع / عمرو التاجي
 
dell275التاريخ: الحد, 2015-02-24, 0:39 AM | رسالة # 2
عضو جديد
مجموعة: مستخدمين
رسائل: 2
سمعة: 0
حالة: Offline
السلام عليكم
 
dell275التاريخ: الحد, 2015-02-24, 0:48 AM | رسالة # 3
عضو جديد
مجموعة: مستخدمين
رسائل: 2
سمعة: 0
حالة: Offline
ا biggrin biggrin السلام عليكم ::انا جديد فى النش وبادء بحجات قليله واول فرد حمام يطير منعندى تحت التدريب واريد اعرف امكنياته الفرد الى عندى انا عندى فرد نوعو سلفر وانا معرفش اى امكنيت عنه فى الطيران اوقوت مهاراته واطلب منكم المساعده بمعلوما تفيد """"تدريبى لفرد الحمام يعنى بخده مكان واسيبو يرجع لوحو وكل يوم ببعد عن اليوم الى قبليه شويه وبسيبه حاليا على بعد 1كم ونصف تقريبا هل ده صح ام خطئ""""

شكـــــــــــــــــــــــــــــــــــــــــــرآ
 
منتدى » المواضيع العامه » للمبتدئين » للمبتدئين فى النـــــــــــــــتش (كل مايخص تدريب الحمام على النش من الألف الى الياء)
صفحة 1 من%1
بحث:

Copyright MyCorp © 2017